Nadir Əzhəri

"Buyurun gözəl düşmənlərim" kitabından seçmələr.




Öz aramızda

Ulduzlar bilməsin, ölürəm
Deyin gedibdir günə çıxa
Kim-kimədir gecəni gizlədin!
Yoxsa bilirəm, əldən getmişik
Yoxsa bilirəm, əldən gedirik
Ulduzlar bilməsin, ölürəm!



...Kцçmüş quşlar

Gözlərindən biraz sabaha saxla !
Mən də şərabımı
Az-az içərəm
Keçin, köçmüş quşlarıla keçin
Keçin, küsmüş röyalarıla keçin
Yoxsa bilirəm, gecələr, uyumamağın ...
Yoxsa bilirəm, yuxulardakı ağlamağın ...
Ah ...
Hər gül gözlərimdə solacaq
Göz vurmayacaq, sənə heç vurğun daha
Gözlərindən bir az sabaha saxla ,
Mən də şarabımı
Az-az içərəm .


Açiqlama

Dünya:
Bir uşaq ki oyuncaqların alıblar əlindən
Və hayat:
Bir çirkin dulun xoş günləri!
Və sevgi baxar kordu, sevgi baxar kor
Tanrı baxar kordu, tanrı baxar kor
Və mən burada bütüm kabuslaram
Gör.


Adreslər

Deyirəm bir az da dolanım
Bu dönümdə bəlkə o dayanıb
Deyirəm bir az da arayım
O ağac dalısında bəlkə oyanıb
Sanki təzə itibdir...
Fərq etməz axtaram haranı
Bu zamanda adreslər itmək üçündür
Və o hər an təzədən itir .


Adaxlılar üçün

Adaxlılar parkasında təkəm
Və indi hünərim
Göydəki öpüşləri qapmaq
Öpüş yollamaqları yazmaqdır
'Maşalla' maçılar* sizə,'maşalla' maçılar
Muuu...ç !

*öpüşler

Əff edərsiz

Arxamda bir qapı yox çırpmağa
Yalnızlar gülsün, yalnızlığıma
Gedər-gəlməz məktublarım necədir ?
Yazığım gəlir yazdığıma .
Bu ölkə mənim ölkəm dəyil ?
Bu el bu camaat yabancısıyam
Sevirəm mən də Azərbaycanı
Mən də Azərbaycan yalançısıyam ! ?


Axşam sətirləri

Ax sazlardakı sazaxlar əsir yelilə
Ax sazlardakı sazaxlar
Batıda bulutlardı gülən, (dostum dəyil)
Batıda bulutlardı gülən .
Hər kölgə bir vida izidir gecələrimdə
Hər kölgə bir vida izidir .
Sigara kötüklərim utanır nisgillərimdən
Sigara kötüklərim büzük !
Özümü səslədim gecələrdəki yananım yox
Özümü səslədim !
Və bunlar da axşam sətirlərim
Yetimlərim .


Bağlar bağı

Çiynimdə Ərdəbil çəni heyyy ...
Və endim dağlar dağından
Gəldim 'bağlar bağı'na
Mizimizdəki sevgi üçün
Arılar da sevinirdi
Səslərdən murabba pişirirdik !
İndisə dağlar dağından enən yolçu
Bağlar bağında sənilə uçur
________

Bağlı pəncərə

Ah bağlı pəncərə !
Ah bağlı pəncərə !
Çox görmə mənə kölgəsini
Çox görmə mənə kölgəsini ...
Gecə ıslaq
Və yenə o ışıq ...
(Yaşamadığım günlər evində yanır!)
Ah bağlı pəncərə !
Daha ondan
Daha hər nədən kölgələri
Yaşayıram.


Baxça

Sənin əlində xırda çörək
Serçələr ayaq açdısı
Bağçamızda yuxular bitmiş
İndi sən
harada itmiş
Bağçamızda gecə-gündüz
Sənə güllər fal açırlar
Sonra quşlar qəmə qonurlar
Sonra yalnız səni sorurlar
Bağçamız
Yuxusuz qalır .


Bəlkə də

Sətirlər arasında sırtıldadım
Və illərdi kəlmələrin topu atılmır
Bəlkə də kəlmələr mənilə düz demirlər
(Sevgini səsləyirəm
Siyasət geri dönür!)
danlaqlar imla deyirlər mənə
Və danlaqlar imla deyirlər mənə !...

Asılı

Hər nəyin dırnaqdan asılı
Və hər nəyim dırnaqdan asılı
Bütün uçurumlar bizə baxır
Baş qalxızır
Ölüm dişin ağardır
-Ayıl ki hər nəyimiz dırnaqdan asılıdır !...
Amma yuxu dəyil
(Qadınım deyir)
Hər nəyim,dırnaqdan asılı
Hər nəyin dırnaqdan asılı


Bilet

Bütün
Bütün qapılar burada qəpdir
Döymə
Və yollar öz dövrəsinə dolanır
Mənə bir gediş bileti al
Ya da bir vird oxu
Buradan, uçmaq istəyirəm
Yüngül-barı
Xatirəsiz

Borular

Doğuda baş qaldıran borular ...
Cibimdə cəhənnəm kirayəsi !
Atəşə gedirəm
Səhərdir işə gedirəm !
Çarçuvasızam
Və çarpaşıq
Üç yerdə işlədiyiz kimi
Bəlkə də artıq !
Saymağına dəyməyir ücrətimiz
Böylə yaşamaq bizim dəbimiz
Yaşasın məssəbimiz !

Bu mənəm şeir oğrusu!?

Salam ey 'əməli salehlər!'
Ey sərbəst şeirin ev yiyələri
Ajir qoşun, kəlmələrə ajir qoşun
Çünkü mən
Şeir oğrusu !
Gəlirəm
(haradan yanırsız ,
Bilirəm)

Buyurun gцzəl düşmənlərim

Adamsız dəyiləm canım
Mən yanğınların atasıyam
Sigaramı ıldırım alıştırır
Atəşlər adresimi göstərir

Və dünyadakı yağışlar
Qapıma gəlir ...
Dolu gözlərim
Yarım çətvərim
Buyurun Gözəl Düşmənlərim
Və alnı açıq
Sözlərin saçı yeldə
Sözlərinin saçı çöldəydi
(İndi üfüqdən naməhrəm baxır ...)
Bizi heç bir sabah
Bizi heç bir ışıq
Əmizdirmədi !
Yaşasın, ac duyğularım
Bu əllərini ağzına təpmiş duyğularım
Burnu fırtıqlı uşağlar kimi
Nə qədər amma məsum yaşadım ...
Özümdən uzaqda yaşadım
Əllərimdəndə xəbərsiz
Təkcə dodaqlarımı tapdım :
Bu mənəm
Çirkinlərin böyüyü
Qıhalar mənim
Buyurun gözəl düşmənlərim !